E hëna i gjeti sërish duke protestuar para Komunës së Prishtinës.
Kështu, punëtorët e “Trafikut Urban” dhe operatorët privatë kanë pezulluar punën që një javë.
Që nga data 24 nëntor ata përmes protestave po kërkojnë pagesën e borxhit që Komuna u ka atyre.
Ani pse Komuna e Prishtinës të enjten mori vendim për bartjen e mjeteve vetanake në vlerë 28 milionë euro, paratë ende nuk janë alokuar në xhirollogaritë e operatorëve.
Andaj, Ilmi Gashi, kryetari i sindikatës së “ Trafikut Urban”, thotë se tani radhën e ka Ministria e Financave për të vepruar.
“Vazhdon edhe sot deri në alokimin e mjeteve borxh që detyrohet Komuna të shlyej borxhet ndaj ‘Trafikut Urban’ dhe operatorëve privatë. Vendimi që është marrë ditën e enjte nga asambleja për bartjen e të hyrave vetanake për vitin 2024 në vitin 2025, që arrin vlera 28 milionë, është dërguar nga Komuna te Ministria e Financave. Po presim nga Ministria e Financave që të kthejë këtë vendim me pozitiv për ne”, tha Ilmi Gashi – kryetar i sindikatës së “Trafikut Urban”.
E lajme të mira po presin edhe punonjësit e operatorëve privatë, të cilët qëndruan krahë punëtorëve të “Trafikut Urban”, për dy orë radhazi para Komunës së Prishtinës.
“Problemi është se nuk mund të fillojmë punën pa u alokuar mjetet. Së pari duhet të paguhen pagat që nuk kanë marrë që gjashtë muaj dhe të kryhen obligimet ndaj furnizuesve, pasi nuk japin më naftë pa i kryer obligimet, problemi është këtu. Në atë ditë që i qesin paratë, do të jemi të kënaqur dhe do të fillojmë punën”, tha Izet Smajli – kryetar i sindikatës së linjave private.
Edhe pse të hënën nuk e filluan, mbetën më shpresë tek e marta.
“Akoma nuk kemi marrë asnjë informatë për rrjedhën e asaj se çfarë duhet të bëjë ministria t’i alokojë parët tek Komuna, deri në alokimin e parave në xhirollogaritë e Trafikut Urban dhe sektorit privatë, ne do të vazhdojmë me protesta njëjtë sikur sot nga ora 10:00 deri ora 12:00. Dy orësh protesta do të jetë deri në kohën që i marrim paratë në xhirollogarinë tonë”, tha Gashi.
Televizioni ka dërguar pyetje edhe në Ministrinë e Financave, Punës dhe Transfereve për të kuptuar se kur do të alokohen mjetet vetanake të Komunës së Prishtinës, mirëpo deri në momentin e publikimit të kronikës nuk ka pranuar përgjigje.
Edhe të hënën qytetarët e komunës së Prishtinës kanë mbetur pa transport.
