Një operacion i përbashkët i Policisë së Kosovës dhe autoriteteve spanjolle ka çuar në arrestimin e një personi të kërkuar ndërkombëtarisht për veprën penale “rrëmbim i fëmijës”.
Sipas Policisë së Kosovës, Drejtoria për Bashkëpunim Ndërkombëtar Policor kishte pranuar përmes INTERPOL-it një njoftim nga autoritetet spanjolle se shtetasi gjerman me inicialet A.M.L., i lindur në vitin 1989, dyshohej se kishte rrëmbyer një fëmijë gjashtëvjeçar dhe ndodhej në Republikën e Kosovës së bashku me të.
Pas pranimit të informacionit, Policia e Kosovës, në koordinim me njësitë përkatëse, ndërmori veprime operative për lokalizimin dhe arrestimin e të dyshuarit, ndaj të cilit ishte lëshuar urdhër-arrest ndërkombëtar nga autoritetet e Spanjës.
Operacioni rezultoi i suksesshëm më 24 qershor 2026, kur i dyshuari u lokalizua dhe u arrestua në një lokacion në Fushë Kosovë, së bashku me fëmijën e rrëmbyer.
Me urdhër të prokurorit kujdestar, i dyshuari është ndaluar për 48 orë, ndërsa fëmija është trajtuar sipas procedurave ligjore dhe është vendosur në strehim të sigurt.
Policia ka thënë se në koordinim me prokurorin e rastit, Qendrën për Punë Sociale dhe autoritetet spanjolle, pas verifikimit të të gjitha rrethanave, më 25 qershor 2026 është realizuar kthimi i sigurt i fëmijës te nëna e tij.
Policia e Kosovës e ka cilësuar operacionin si rezultat të bashkëpunimit të suksesshëm ndërkombëtar në luftimin e kriminalitetit dhe mbrojtjen e fëmijëve./teve1.info/
