Shumica e qytetarëve në nivel global presin që inteligjenca artificiale (IA) të sjellë mundësi të reja punësimi dhe përmirësim të produktivitetit, sipas një ankete të fundit të Programit të Zhvillimit të Kombeve të Bashkuara (UNDP).
Rreth 60% e të anketuarve besojnë se IA do të ndikojë pozitivisht në punësimin e tyre, duke krijuar profesione të reja që aktualisht nuk ekzistojnë.
Anketa, e realizuar në 21 shtete dhe në 36 gjuhë, përfshiu mbi 21 mijë pjesëmarrës dhe përfaqëson 63% të popullsisë së botës.
Sipas raportit të UNDP-së “Një çështje zgjedhjeje: Njerëzit dhe mundësitë në epokën e inteligjencës artificiale”, ky optimizëm vjen në një kohë kur zhvillimi njerëzor po stagnon.
Indeksi i Zhvillimit Njerëzor ka shënuar ngecje të pazakontë që nga pandemia, ndërsa krizat ekonomike, borxhet dhe ndryshimet strukturore në tregun e punës po e përkeqësojnë situatën.
Përveç pritshmërive për vende të reja pune, 64% e të anketuarve shprehën bindjen se IA do të përmirësojë produktivitetin, ndërsa vetëm 13% janë të shqetësuar për humbjen e vendit të punës.
Entuziazmi për përdorimin e IA është veçanërisht i lartë në vendet me zhvillim të ulët apo të mesëm, ku 70% e qytetarëve presin përfitime në sektorë si arsimi, shëndetësia dhe tregu i punës.
UNDP thekson se zhvillimi i teknologjisë duhet të udhëhiqet nga parimet e përqendruara te njeriu, duke nënvizuar se algoritmet janë mjete që varen nga drejtimi dhe vlerat e njerëzve.
Raporti përfundon me thirrjen që vendimmarrësit të hartojnë politika gjithëpërfshirëse për të siguruar që potenciali i inteligjencës artificiale të përdoret për të avancuar zhvillimin dhe mirëqenien globale.
