Në shkollën fillore ‘’Ali Asllani’’ në Doganaj të Kaçanikut të Vjetër mësimi herë pas here është i pamundur të mbahet, për shkak të insekteve. E ndërtimi i shkollës së re që filloi para tri vjetësh ka mbetur në gjysmë nga mungesa e mbështetjes financiare nga institucionet qendrore.
Dyert janë mbyllur për nxënësit dhe mësuesit. Kjo për shkak të insekteve që kanë mbushur shkollën “Ali Asllani” në Doganaj të Kaçanikut të Vjetër.
Dezinfektimi i shkollës e pamundëson edhe mbajtjen e mësimit për ta.
Ndërsa shkolla e re që filloi të ndërtohet para tri vjetësh ende nuk ka përfunduar.
“Gjendja e shkollës së vjetër është shumë e keqe. Mësimi nuk mund të zhvillohet normalisht. Kemi pasë probleme edhe javën e kaluar. Kemi dezinfektu shkollën për shkak të disa insekteve; një ditë nuk është mbajtë mësimi. Kështu që po presim që me pasë intervenim sa më të shpejtë dhe me u ndërtu shkolla e re”, thotë Fitim Selmani, drejtor i shkollës “Ali Asllani”
Tëvë1 kërkoi informacion nga Ministria e Arsimit se a është në plan-program mbështetja financiare për përfundimin e kësaj shkolle, mirëpo nga ky institucion nuk është kthyer përgjigje.
E megjithatë, ky projekt është vetëm njëri prej të cilëve komuna e Kaçanikut nuk po pranon fonde nga qeveria për përfundimin e tyre.
“Është viti i tretë i kësaj qeverisjeje që komuna e Kaçanikut nuk e ka asnjë projekt të ri. Veç asaj, me vendimin e fundit që keni parë nga qeveria, na është cungu edhe të hyrat vetanake që për ne është e papranueshme, pasi na ka ardhë si vendim pa paralajmërim”, Besim Ilazi- , kryetar i Komunës së Kaçanikut
Projekti për shkollën fillore të mesme të ulët ‘’Ali Asllani’’ në Doganaj të Kaçanikut të Vjetër filloi në vitin 2019 dhe ende nuk dihet se kur do të përfundojë.
Ndërsa lidhur me të hyrat vetanake, Asociacioni i Komunave të Kosovës së fundmi mori zotim nga kryeministri Kurti që të fillojë procedura për zgjidhjen e kësaj çështjeje.
