Shiriti i verdhë u vendos sërish rreth një vendpunishte në Kosovë.
Kjo pasi edhe një punëtor, e humbi jetën tragjikisht në vendin e tij të punës.
E gjithë ngjarja ndodhi paraditen e së hënës në “Veterrnik” të Prishtinës, kur 49-vjeçari dyshohet se ra nga ky objekt derisa ishte duke punuar.
Vdekja e punëtorit u konstatua në vendngjarje nga ekipet mjekësore.
E menjëherë pas kësaj, u ndërpre edhe puna në këtë punëtori.
I gjithë rasti u konfirmua edhe nga Policia e Kosovës.
“Sot rreth orës 10:00, kemi pranuar informatën se një person ka rënë nga një lartësi (objekt) në lagjen Veternik në Prishtinë, derisa ishte duke punuar. Viktima mashkull, 49 vjeç, nuk ka arritur të përballojë plagët dhe i njëjti në vendin e ngjarjes ka ndërruar jetë. Vdekjen e viktimës e ka konstatuar ekipi mjekësor në vendngjarje”, thuhet nga Policia.
Ndërkohë, nga Prokuroria Themelore në Prishtinë, njoftoi pasdite se për këtë rast ka ndaluar një person.
“Me urdhër të Prokurorit të Shtetit është ndaluar një person i dyshuar me inicialet Xh.Sh., për 48 orë, nën dyshimin e kryerjes së veprës penale ‘’Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, ka njoftuar Prokuroria.
Ndryshe, ky nuk është rasti i vetëm tragjik këtë vit, ku jeta e punëtorëve në Kosovë, përfundon tragjikisht.
Sipas të dhënave zyrtare, për 7 muaj të vitit 2026, 12 persona kanë humbur jetën në vendin e punës.
