Prokuroria Speciale e Kosovës ka njoftuar se Bojan Jevtiq, zyrtari policor i arrestuar të enjten, është ndaluar me masë paraburgimi prej 48 orësh.
Jevtiq u arrestua në pikën kufitare “Dheu i Bardhë”, nën dyshimet për përfshirje në veprimtari spiunazhi në bashkëpunim me shërbimin sekret serb (BIA). Hetimet ndaj tij janë zhvilluar për disa muaj nga Prokuroria Speciale në koordinim me Inspektoratin Policor të Kosovës (IPK) dhe Agjencinë e Kosovës për Inteligjencë (AKI).
Sipas njoftimit të Prokurorisë, gjatë bastisjes në banesën e Jevtiqit në një fshat të komunës së Kamenicës janë sekuestruar materiale të rëndësishme që lidhen me rastin, përfshirë:
Dokumente konfidenciale të Policisë së Kosovës,
Disa telefona të mençur dhe USB,
Një armë e shkurtër me municion,
Para të gatshme: 10,000 euro, 2 milionë dinarë serbë dhe 600 franga zvicerane,
Dëshmi të tjera që do të ekzaminohen gjatë fazës hetimore.
Inspektorati Policor ka rekomanduar suspendimin e togerit policor, i cili mbante funksionin e shefit të operativës në pikëkalimin kufitar “Dheu i Bardhë”, derisa zhvillohen procedurat hetimore.
Autoritetet nuk kanë dhënë më shumë detaje mbi rrjedhën e mëtejme të hetimit, por rasti është cilësuar si i ndjeshëm dhe me rëndësi për sigurinë kombëtare të Republikës së Kosovës.
