Tëvë1 sjell rrëfimin e 46-vjeçares, Arnisa Osmani se si e mposhti kancerin e gjirit, derisa u bënë thirrje të gjitha grave të bëjnë kontrolle të rregullta.
Kujtimet i ka ende të freskëta.
Ani pse kanë kaluar gjashtë vite, Arnisa Osmani ende e kujton momentin kur iu kumtua lajmi se është prekur nga kanceri i gjirit.
“Lajmin kur e kam marrë vesh para 6 vitesh nuk ka qenë një lajmë i mirë, vet fjala kancer nuk është një fjalë e mirë e lerë më kur mjeku të thotë që në trup ke kancer. Mirëpo është dashtë me luftuar atë send deri në fund”, tha Arnisa.
Ajo thotë se kjo sfidë vetëm se e ka bërë ta shohë jetën me më shumë ngjyra.
“Kjo sfidë Arnisën e ka mësuar me dashtë jetën më shumë, me pa jetën me sy tjetër që jeta është shumë e mirë pa marrë parasysh se çfarë sfidash na sjellë. Gjithmonë duhet të mendojmë se në fund të tunelit gjithmonë ekziston një dritë”, tha ajo.
E dritën e gjeti edhe vet Osmani pasi që sot e kësaj dite gëzon shëndet të plotë, derisa inkurajon të gjithë gratë që të bëjnë mamografi.
“Përnjëherë vetëm më tha ti më nuk ki çka me bo analiza dhe incizime, thash qysh skam çka me bo, tha ti më nuk je paciente e jona ti je shoqja jonë”.
Nga Klinika e Radiologjisë thonë se ka numër të lartë të të interesuarave për të bërë mamografi.
“Duke filluar nga fillimi i vitit, nga fillimi i janarit deri tashmë me datën 10 nëntor vetëm në mamografinë statik janë kryer së paku 2590 mamografi. Ndërsa edhe mbi 500 janë kryer me mamograf mobil dhe kemi kaluar mbi 3000 mamografi vetëm në QKUK”, tha Shkendije Nuza, drejtoreshë e Radiologjisë në QKUK.
Nga ky institucion thonë se ka pasur fushata sensibilizuese në tetor e që qëllimi i vetëm i tyre është vizita te mjeku edhe pa qenë nevoja.
“Qëllimi është të bëjnë mamografi pa ankesa klinike domethënë të mos presin, të mos vjen deri tek periudha kur do të prekë diçka por të zbulojmë tumorin kur ende është i pa prekshëm nga dora e pacientit apo nga dora e mjekut”, tha drejtoresha Nuza.
E nga Drejtoria e Shëndetësisë Publike në kryeqytet bënë të ditur për televizionin se janë ndarë subvencione për personat e prekur nga kanceri i gjirit.
“Gjatë këtij viti ne kemi ndarë diku mbi 600 subvencionet që janë të prekura me kancer të gjirit, shuma e tyre është 250 euro një herë në vit. Ne e dimë që kjo shumë nuk është e mjaftueshme por së paku është një shumë e cila disa prej shpenzimeve të tyre mundet me i mbulua me këtë shumë”, tha drejtori i Shëndetësisë në Prishtinë, Izet Sadiku.
Bërja e mamografisë dhe rikonstruktimi i gjirit mund të realizohen falas në sistemin shëndetësor publik.
