Megjithatë njëri nga institucionet përgjegjëse për mbrojtjen e qytetarëve vazhdon të mos ketë Drejtor të Përgjithshëm që nga fundi i gushtit, teksa kompetencat e tij i kryen Ushtruesi i Detyrës.
Nga Ministria e Brendshme përmes një përgjigje elektronike thonë se janë në proces të përzgjedhjes.
“Ju njoftojmë se Komisioni për Emërime të Larta në Policinë e Kosovës, është në proces të Përzgjedhjes së Drejtorit të Përgjithshëm të Policisë së Kosovës”, thuhet në përgjigje.
Fakti që është një ushtrues detyre është në krye të policisë, sipas Arbër Rexhajt nga Komisioni për Siguri, nuk ka probleme në aspektin e kompetencave.
“Po mendoj që ai është në fillin e analizave dhe pas analizave do ta bëj këtë gjë. Natyrisht është pjesë edhe e vizionit të Qeverisë në kuptimin e asaj që mbi bazën e kompetencave që ka sigurisht që nuk do të vonojë edhe ky aspekt procedural “, tha Rexhaj.
E sipas deputetit të Partisë Demokratike të Kosovës Rashit Qalajt, një vonesë e tillë për zgjedhjen e drejtorit është e pakuptimtë.
“Ju e dini që i kemi pesë kandidatë që kanë aplikuar dhe që tre muaj ata janë duke pritur se a do të thirren për intervistë apo jo. Mendoj që është e pakuptimtë sidomos duke e pasë parasysh këtë situatë që e kemi mjaft të tensionuar në veri dhe duke i pasë parasysh nevojat e shumta në aspekt të mbështetjes me logjistikë por edhe urdhra të qartë për realizimin e objektivave”, deklaroi Qalaj.
Drejtori i fundit i policisë, Sabedin Mehmeti, dha dorëheqje më 30 gusht. Detyrën e tij që nga atëherë po e ushtron Fehmi Hoti.
Konkursi për drejtorin e ri të PK-së ishte i hapur deri më 22 shtator e për këtë pozitë aplikuan Fatos Haziri, Granit Fetahu, Gazmend Hoxha, Bahri Shala dhe Sllagjana Stojanoviq.
Kronika e gazetarit Gojart Jashari.
