Mjafton një skenim i thjeshtë për dy informacione.
E para ka të bëjë me historikun e xhamisë, ndërsa e dyta me atë të imamëve që shërbyen në të.
Është ky kodi i parë që u vendos në hyrje të xhamisë “Karamanllë” në Vushtrri.
E nga një të tillë, shumë shpejt pritet të kenë të gjitha xhamitë e këtij qyteti.
E ideja për këtë, ishte e kryetarit të ri të Këshillit të Bashkësisë Islame në Vushtrri, Ejup Haziri.
“Ideja ka qenë që njerëzit, besimtarët por edhe vizitorët, ata që e frekuentojnë xhaminë, me pas njohuri për historikun e xhamisë. Ky është një “QR Code” ndërlidhet me historikun e xhamisë. Kjo xhami është nga më të vjetrat në Vushtrri, diku 500 vjeçare”, thotë Ejup Haziri, kryetar i KBI-së në Vushtrri.
E shumë shpejt me një skenim, vushtrriasit kanë rastit të njihen edhe me historikun e gjithë imamëve që shërbyen në këto xhami.
“Janë disa imam që kanë shërbyer në këtë xhami, është xhami e vjetër diku 500 vjeçare, por për disa imam kemi shënime dhe të dhëna, i kemi edhe disa foto që do t’i fusim si informacione”, ka thënë ai.
E imami i kësaj xhamie, Fahri Bahtiri, shpreson që këtë hap ta ndjekin të gjitha xhamitë e vendit.
“Po shpresoj që kjo ide, t’i përfshijë të gjitha xhamitë e Kosovës, që gjeneratat e reja të njihen për së afërmi për historikun e xhamive të Kosovës dhe njerëzve që kanë shërbyer në to, si imam, myezinë apo diçka tjetër”, thotë Fahri Bahtiti, imam në xhaminë “Karamanllë” në Vushtrri.
Ide mjaft të qëlluar, po e vlerësojnë edhe vushtrriasit.
Informacionet që dalin nga skenimi i këtij kodi, tani për tani janë vetëm në gjuhën shqipe.
Ndërsa, shumë shpejt, pritet të përditësohen edhe gjuhët e huaja.