Gazetari Valon Syla ka reaguar pas dy ditëve në arrest, duke sqaruar situatën lidhur me akuzat për dhunë në familje që janë bërë ndaj tij. Në një deklaratë në rrjetin social Facebook, Syla ka mohuar kategorikisht çdo veprim të dhunshëm fizik.
“Nuk jam i dhunshëm në kuptimin publik, as në boksa apo shkelma. Rasti ka të bëjë më shumë me një fjalosje në afekt, me ngrehje krahu, për të cilën kërkoj falje asaj, familjes së saj dhe timen,” ka thënë Syla.
Ai ka treguar se pas një ndalimi prej 2 ditësh dhe një procedurë të rregullt në mëngjes, është liruar, por më vonë është thirrur përsëri në polici dhe për shkak të urdhrit të prokurores është dërguar në arrest për 48 orë.
Syla përmend se kjo masë është marrë si një presion politik dhe i është bërë një lincim publik pa ndodhur ende procesi gjyqësor dhe pa aktakuzë zyrtare. Ai ka kritikuar edhe reagimet e Ministres së Drejtësisë, Albulena Haxhiu, dhe eksponentëve të VV-së, të cilët sipas tij, kanë gjykuar publikisht pa të drejtë.
“Besoj në drejtësi dhe jam i bindur se ajo do të triumfojë,” ka thënë gazetari, duke kërkuar falje për keqkuptimet që kanë mundur të lindin tek miqtë dhe ndjekësit e tij.
Në ditët në vijim, Valon Syla paralajmëron se do të japë më shumë sqarime në emisionet televizive për këtë rast.
