Ai për Tëvë1 tha se Bashkimi Evropian tregoi se ka kapacitete për menaxhimin e krizave.
“Ka pasur një zgjidhje për çështjen e dokumenteve hyrëse/dalëse që kishte rritur tensionet përgjatë kufirit dhe ky është një zhvillim shumë i mirëpritur. Serioziteti me të cilin BE veçanërisht Josep Borrell punoi për të arritur një zgjidhje ishte gjithashtu shumë i mirëpritur. Kjo tregon se BE-ja është e aftë për menaxhim efektiv të krizës”, tha ai.
Megjithatë ai shprehet skeptik se së shpejti do të ketë një marrëveshje finale, për shkak dallimeve që kanë dy shtetet.
Sipas tij, do të kalojë edhe një kohë e gjatë deri në normalizimin e plotë të marrëdhënieve mes Kosovës dhe Serbisë.
“Megjithatë, nuk ka pasur lëvizje të mëtejshme drejt normalizimit të marrëdhënieve ndërmjet Kosovës dhe Serbisë. Dallimet mes palëve mbeten të mëdha. Një marrëveshje përfundimtare nuk është ende në horizont”, theksoi ai.
Tensionet e fundit mes Kosovës dhe Serbisë, kanë tërhequr vëmendjen e bllokut evropian dhe Shteteve të Bashkuara të Amerikës.
Për më tepër presidenti i Francës, Emmanuel Macron, dhe kancelari i Gjermanisë, Olaf Scholz, kanë emëruar këshilltarët e tyre për të ndihmuar dialogun.
Kronika e realizuar nga Shpat Blakçori.
