Në maje të kodrës, pamje të bukur i jep gjithë fshatit.
Kjo xhami në fshatin Zhazhë në komunën e Zveçanit, e ndërtuar në vitin 2018 me iniciativë të një mërgimtari.
Po në këtë vend, të mërkurën u fal namazi i Fitër Bajramit nga qytetarët e besimit islam.
Xhemati fillojë të rreshtohet nga imami, e me tekbire filloj edhe fjalimi i hoxhës.
Hoxha, Xhemajl Cerani u lutë për vepra të pranuara gjatë muajit të ramazanit.
“Gjatë këtij muaji të ramazanit, kemi pas obligime ndaj Allahut, që ta agjërojmë muajin e ramazanit, përpos agjërimit të muajit të ramazanit, kemi pasë edhe shtesë të namazit, përveç pesë kohëve të namazit, kemi pas faljen e namazit të teravive. E lusim Allahun që këto ibadete që i kemi bërë gjatë këtij muaji të ramazanit, me agjërim, me ibadete, me dhënien e zeqatit, sadakatul fiter, Allahu na e pranoftë, Allahu na bëftë kabull”, ishte lutja e imamit.
Pas faljes së Fitër Bajramit, banorët e kësaj ane veriore të republikës, uruan njëri-tjetrin për këtë festë.
Përqafime bënë edhe fëmijët.
Përgjegjësi i këtij objekti fetar, tha se prania e xhematit në ditën e kësaj feste, është kënaqësi, ndërsa tregoi se themelet iu vunë nga një mërgimtar në Finlandë.
“Kjo është kënaqësi e madhe, kur i sheh gjithë këta xhematë këtu, që kanë ardhur. Xhami këtu nuk ka pas përpara, është një kusheri i joni në Finlandë i cili e ka folur këtë, unë një, edhe një kushëri dy, jemi udhëheqës nga temeli i xhamisë deri në fund të kësaj xhamie. Me ndihmën e popullit e kemi ndërtuar këtë xhami, se s’kemi pas këtu”, tha ai.
E një mërgimtar nga Britania e Madhe, i cili fali namazin për herë të parë në këtë xhami, u ndje i lumtur edhe për sigurinë e krijuar në pjesën veriore, por edhe shtrimin e rrugës që ua mundëson faljen e namazeve, fshatarëve të kësaj pjese.
“Është krenari, sidomos në vendlindje, ndihem shume i priveligjuar që na kanë dhënë këtë mundësi, e kemi një llojë sigurie në këtë rajonin e Shalës e quajmë ne, në fshatin Zhazhë, në pjesën veriore, ka njerëz, ka të rinj, ia kanë kthyer privilegjin këtij fshati.. I ndihmon xhamia, i ndihmon ndërtimi i rrugës, i ndihmon kontributi që po i jep qeveria për këtë pjesë veriore”, tha qytetari Ismet Peci.
Pas faljes së namazit, banorët e kësaj zone u shpërndanë, e dielli zbukuroi malet e fshatrave veriore të Republikës.
