Lirshëm nëpër Europë do të mund të lëvizin edhe serbët që kanë pasaporta të shtetit të Serbisë.
Kjo u mundësua nga Komisioni për Liri Qytetare dhe Punë të Brendshme të Parlamentit Evropian.
Ky vendim vlerësohet se cënon sovranitetin e Republikës së Kosovës.
“Është diçka e pazakonshme, një veprim i pavend, i padrejtë dhe diskriminues në relacion me institucionet, shtetësinë e Kosovës dhe Republikën e Kosovës. Vendimi si i tillë nga një trup, organizëm punues, që përpiqet të luajë rolin e vendimmarrësit, është ndërhyrje në punët e brendshme të Kosovës dhe prek sovranitetin e Republikës së Kosovës”, ka vlerësaur njohësi i Kushtetutës, Mazllum Baraliu.
Madj ky vendim llogaritet me potencial për pasoja në të ardhmen, thotë analisti Fidan Ukaj.
“Kjo përpjekje e Komisionit Evropian për t’i liberalizuar vizat për qytetarët serbë të Kosovës që kanë pasaporta të Serbisë, mendoj se është një inkurajim për mosintegrim të qytetarëve serbë brenda territorit të Kosovës. Ky veprim i Komisionit Evropian do të ketë pasoja për të ardhmen dhe do t’i inkurajoj serbët e Kosovës që të mos pajisen me dokumente të shtetit ku ata jetojnë. Këto pasaporta nga ana e Kosovës janë ilegale dhe legalizimi ose njohja ose dhënia e mundësisë nga ana e Komisonit Evropian, që me to të udhëtojnë në zonën shengen, është një gabim që do të prodhojë pasoja në të ardhmen”, ka thënë ai.
Mirëpo, këtë liberalizim e kanë mbështetur edhe ambasadorët e vendeve anëtare të BE-së.
Me precedent të rrezikshëm, e sheh edhe Qeveria e Kosovës këtë vendim.
“Ritheksojmë se pasaportat ilegale të lëshuara nga Serbia shkelin sovranitetin dhe integritetin territorial të Republikës së Kosovës, andaj dhe nuk mund të njihen apo të jenë dokument i vlefshëm udhëtimi. Ky qëndrim rrezikon të krijojë një precedent të rrezikshëm, kur vetëm para më shumë se një viti, një tentativë e njëjtë për njohjen e dokumenteve ruse të udhëtimit të lëshuara në Ukrainë dhe Gjeorgji, u dënua dhe nuk u pranua nga vetë institucionet e BE-së”, ka thënë Klisman Kadiu, shefi i kabinetit të zëvendëskryeministrit Besnik Bislimi.
Pasaportat serbe për serbët e Kosovës lëshohen nga Drejtoria Koordinuese në Beograd, e cila punon në kuadër të Ministrisë së Punëve të Brendshme të Serbisë.
