Gjatë ditës së sotme është mbajtur një debat publik në Qendrën Mediale ku temë diskutimi ishte procesi i votimit në veri. Aty, Zëvendësministri i Ministrisë së Administrimit të Pushtetit Lokal, Arbër Vokrri e ka pranuar se kushtet nëpër qendrat e votimit gjatë votimit të së dielës me 21.04.2024 në katër komunat veriore, nuk kanë qenë të mira shkaku i mos lejimit të votimit në 33 shkolla.
Për krejt çka ndodhi në veri me 21 prill u mblodhën për të diskutuar në Qendrën Mediale në Çagllavicë politikanë shqiptarë dhe serb.
Në këtë tryezë me tëmën “Referendumi në veri – A i ka përmbushur qeveria ndryshimet ndaj BE-së apo mungesa e ndryshimeve paraqet shenjë dështimi”, Dusan Radakoviq, aktivist i shoqërisë civile nga komuniteti serb në veri tha që kushtet në të cilat u zhvillua votimi të dielën për shkarkimin ose jo të katër kryetarëve nuk kanë qenë të duhura.
“Problemet e radhës kanë qenë vendosja e kutive për votim, ka qenë e pa kuptim, edhe kamera ka mund të shoh për kënd po voton. Unë e di që ka pas probleme me shkollë, mirëpo kushtet me të vërtetë në disa vende kanë qenë jo humane” , tha ai.
E disa prej ankesave për kushtet nëpër qendrat e votimit i pranoi edhe Zëvendësministri i Ministrisë së Administrimit të Pushtetit Lokal, Arbër Vokrri.
“Gjatë këtij procesi, logjistika nuk ka punuar shumë mirë, siç e dini, shkollat nuk kanë qenë në dispozicion pasi Lista Serbe nuk ka dhënë leje dhe ne nuk kemi dashur që të krijojmë tensione me zor apo me Policinë t’i hapim. Unë edhe njëherë kisha thënë se nuk i ndjejë tensionet, nuk jam çdo ditë në veri, por flas me ta. Nuk jam shumë i lumtur me situatën, por atje mbizotëron njëfarë qetësie”, deklaroi Vokrri.
Pjesë e këtij paneli ishte edhe kryetari i Partisë së Serbëve të Kosovës, Aleksandar Jabllanoviq.
Pati lëvdata për KQZ-në por jo edhe për Qeverinë.
“KQZ mendoj që sipas meje ka bërë një lëvizje të mençur duke vendosur të mos hyjë në shkolla sepse kjo do e kishte rënduar situatën. Ka pasur ndikim nga Lista Serbe, nga Qeveria e Kosovës, qytetarët mendoj që kanë qenë konfuz në një anë. Në anën tjetër mendoj që Qeveria ka dëshiruar që ky proces të jetë vetëm i implementuar, pa pasur ndonjë sukses”, tha ai.
Jabllanoviq pati akuza edhe ndaj kryetarit të Leposaviqit, Lulzim Hetimi.
Sipas tij në këtë komunë ka nepotizëm, pasi deri më tani janë të punësuar 11 familjarë të kryetarit.