Gjykata Themelore në Gjakovë ka vendosur masën e paraburgimit prej 30 ditësh ndaj personit me inicialet A.I., i cili dyshohet për vrasjen e dyfishtë që ndodhi të enjten në fshatin Golluboc të Malishevës.
Lajmin e ka konfirmuar zëdhënësi i gjykatës, Lekë Muqaj, i cili ka bërë të ditur se masa është caktuar pas kërkesës së paraqitur nga Prokuroria Themelore e Gjakovës.
“Gjykata ka aprovuar kërkesën e prokurorisë dhe ka caktuar paraburgimin në kohëzgjatje prej 30 ditësh ndaj të dyshuarit A.I., për shkak të dyshimit se ka kryer veprat penale ‘vrasje e rëndë’ dhe ‘mbajtje në pronësi, kontroll ose posedim të paautorizuar të armëve’. Masa do të vlejë nga data 7 nëntor deri më 6 dhjetor 2025”, ka deklaruar Muqaj.
Sipas hetimeve fillestare, A.I. dyshohet se ka privuar nga jeta dy vëllezërit e bashkëshortes së tij.
Pas ngjarjes, ai ishte gjetur i plagosur dhe kishte marrë trajtim mjekësor në Qendrën Klinike Universitare të Kosovës, nga ku më pas është dërguar në paraburgim.
