Që 11 ditë kanë nisur punimet e urave mbi lumin Ibër të cilat do të lidhin Mitrovicën Jugore me atë veriore.
Për ndërtimin e kësaj ure, Ministria e Infrastrukturës ka nënshkruar kontratë në vlerë prej 2 milionë e 999 mijë euro me kompaninë “Eurokos Holding” me procedurë të negociuar.
Mirëpo ende pa u bërë dy javë, Prokuroria Speciale ka nisur hetimet rreth mënyrës së dhënies së këtij tenderi.
E nga kjo Prokurori bënë të ditur se hetimet nuk kanë të bëjnë me ndonjë kundërshtim ndaj projektit në fjalë, por me përmbushjen e obligimeve ligjore.
Këtë veprim të Speciales, nga Lëvizja Vetëvendosje e konsideruan për keqardhje.
“Fakti që dikush heton kontrata të cilat lidhen me angazhimin e Qeverisë së Kosovës për të shtruar sovranitet, ligj, për të përmirësuar lirinë e lëvizjes së qytetarëve, për me shtri rendin edhe ligjin, pra ndërtimin e urave, dhe i sheh si rrezik, e shkelje të ligjit, nuk kam fjalë tjetër pos të shpreh mllef për një gjë të tillë”, tha Artan Abrashi nga VV-ja.
Për këto hetime, ministri në detyrë i Administrimit të Pushteti Lokal, Elbert Krasniqi, nuk pati koment.
“Nuk mundem me i komentu hetimet, le të hetohet, urat janë të rëndësishme i lidhin veriun dhe jugun”, tha Krasniqi.
Kurse ish kryetari i Mitrovicës, njëherazi deputet i Vetëvendosjes, Agim Bahtiri ka thënë se ndërtimin e urave nuk do të ndal askush.
“Jam i kënaqur se po marohen urat mbi lumin Ibër, dhe jam shumë i lumtur për këtë. Çka do që ndodh urat po marohen, këtë s’mundet me ndalë askush”, tha Bahtiri.
Por në anën tjetër, sipas avokatit, Qëndrim Arifi, tenderët njëburimor janë të ndjeshëm pasi siç thotë ai, cenohet konkurrenca.
Derisa e sheh shqetësuese bërjen publike të nisjes së hetimeve.
“Dalja kaq herët e informatave në publik e prish padyshim integritetin e procesit sepse ti i lajmëron vetë shkelësit potencial që jemi në faza hetimore. E dyta, lajmërimi që kemi mbi 2 mijë tender në punë, për mua më së paku paraqet joprofesionalizëm dhe përbën paaftësinë për dhënie epilogu këtyre hetimeve”.
Ndërtimi i këtyre urave u bë i mundur pas një memorandumi të bashkëpunimit ndërmjet Ministrisë së Mjedisit, Planifikimit Hapësinor dhe Infrastrukturës me Komunën e Mitrovicës së Veriut dhe Komunën e Mitrovicës së Jugut.
Tëvë 1 ka kërkuar sqarim edhe nga Ministria e Infrastrukturës rreth këtyre hetimeve dhe arsyeve pse kjo kontratë është dhënë me procedurë të negociuar por nuk ka marrë përgjigje.
