Dje, në Ohër të Maqedonisë së Veriut, kryeministri i Kosovës, Albin Kurti dhe presidenti i Serbisë, Aleksandar Vuçiq, me ndërmjetësuesit e BE-së, kanë arritur të pajtohen që të fillojnë zbatimin e Marrëveshjes për normalizimin e raporteve sa më shpejt që është e mundur. Megjithatë, kjo Marrëveshje nuk është nënshkruar zyrtarisht, raporton teve1.info.
Për mosnënshkrimin e kësaj Marrëveshje, presidenti serb, Vuçiq, një ditë pas takimit ka thënë se nuk do që të bëjë marrëveshje juridike ndërkombëtare me Kosovën.
“Para së gjithash, sepse Republika e Serbisë është një vend i njohur ndërkombëtarisht, ndërsa ajo siç e quajnë Republika e Kosovës nuk është. Nuk dua të bëj marrëveshje ndërkombëtare me Kosovën”, ka thënë Vuçiq.
Ai në konferencë deklaroi se vijat e kuqe janë “kundërshtimi i njohjes së Kosovës si shtet i pavarur dhe anëtarësimit të Kosovës në OKB”.
Ai shtoi se Serbia është e gatshme të punojë në zbatimin e saj deri në këto vija të kuqe, raporton Danas.
Vuçiq, tutje ka thënë se bisedimet nuk janë të lehtë sepse ka interesa të ndryshme nga palët.
“Bisedimet nuk janë asnjëherë të lehta sepse palët janë të kundërta dhe kanë interesa të ndryshme”, tha ai.
“Kjo nuk është veçanërisht e vështirë për ne. Do të ketë shumë gjëra më të vështira për ne në të ardhmen”, tha Vuçiq mes tjerash.
Ai ka theksuar se Serbia nuk varet më vetëm nga vullneti i mirë i Prishtinës.
Gjithashtu, ai ka treguar se gjatë bisedimeve të djeshme në Ohër të Maqedonisë së Veriut, teksti është ndryshuar 12 herë.
