Vendet që janë pjesë e nismës “Open Ballkan” gjatë të martës njoftuan se janë duke e shqyrtuar mundësinë për mospjesëmarrje në takimin e datës 23 qershor mes BE-së dhe Ballkanit, pasi Bullgaria, po përdorte veton kundër hapjes së negociatave për Maqedoninë e Veriut, çka kishte bllokuar edhe Shqipërinë.
Por, një ditë para këtij takimi, Bullgaria u tërhoq, ndërsa Tirana, Shkupi e Beogradi zbutën më pas qëndrimin e tyre, duke iu përgjigjur pozitivisht takimit në Bruksel.
Një lajm të tillë e ka konfirmuar, Komisioneri për Fqinjësi dhe Zgjerim i Bashkimit Evropian, Oliver Varhelyi, përmes një postimi në Twitter.
“Falënderojmë liderin e opozitës Boyko Borissov për marrjen e një vendimi historik për Evropën dhe për pranimin e negociatave me Maqedoninë e Veriut bazuar në propozimin francez që lejon vazhdimin me hapjen e negociatave të anëtarësimit me Maqedoninë e Veriut. Ne presim që qeveria t’i bëjë propozimet e nevojshme Parlamentit sot në mënyrë që Evropa të mund të ecë përpara”, shkroi ai.
Lidhur me këtë, profesori universitar nga Maqedonia e Veriut, Mersel Bilalli në një prononcim për Tëvë 1 tha se tani shumë shpejt mund të ndodh hapja e negociatave për Maqedoninë e Veriut dhe Shqipërinë.
“Unë mendoj se ajo do të ndodh, qoftë se nuk ndodh tani këto dy ditë pra në fund të presidencës franceze, ajo nuk do të ndodh për shkaqe teknike momentale dhe politike. Por ajo duhet të ndodh në tetor që ato bisedime të startojnë, besojë që është kulminacioni i fokusimit politik që domosdo me këto dy vende duhet të startohen bisedimet”, tha ai.
Kronika e realizuar nga Valmir Gallopeni.
