Kryeministri i Kosovës, Albin Kurti, duke folur për situatën në Ukrainë pas sulmeve ruse, tha se Kosova është vigjilente dhe nuk frikësohet.
Në një intervistë për mediumin britanik Sky News, Kurti megjithatë thotë se Kosova sa më parë që i bashkohet NATO-s është e dobishme edhe për rajonin e Evropës.
Tutje, Kurti ka kërkuar nga shtetet evropiane që ta pranojnë Kosovën në Bashkimin Evropian dhe NATO.
“Lukoil, Sberbank dhe shumë kompani ruse mbulojnë Serbinë me degët e tyre dhe kjo është pse qytetarët e Kosovë janë të brengosur nga një president despot i cili mund të shndërroj Ballkanin një fushëbetejë kundrejt demokracive perëndimore. Ne jemi vigjilent dhe nuk frikësohemi. Ne dëshirojmë që t’i bashkohemi BE-se dhe NATO-s, ne aktualisht kemi NATO-n në Kosovë por anëtarësimi sa më i hershëm i Kosovës do të ishe shumë i dobishëm për qytetarët, vendet e Ballkanit dhe në veçanti vet kontinentin evropian”, tha ai, përcjellë teve1.info.
Teksa foli për pushtimin e Ukrainës, ai kujtoi se Kosova e ka përjetuar në të kaluarën një luftë dhe se populli kosovar solidarizohet me atë ukrainas.
Ai kritikoi Serbinë që mbeti i vetmi shtet në Evropë që nuk vendosi sanksione ndaj Rusisë.
“Ballkani s’është imun nga efektet e situatës në Ukrainë sepse në Ballkan kemi shtet që s’i ka vënë sanksion Rusisë, që s’iu bashkua BE-së për të dënuar pushtimin rus, dhe kjo është Serbia, fqinji jonë”, ka treguar ai duke shtuar se Serbia vazhdon të refuzojë njohjen e Kosovës, ndërsa në anën tjetër ruan lidhjet e fuqishme me Rusinë.
Sipas tij, Serbia një pjesë të madhe të armatimit të vetë e ka nga donacionet e Rusisë dhe se shumica e kompanive të mëdha ruse kanë degët e tyre në Serbi.
“Prandaj populli i Kosovës është i shqetësuar se presidenti despotik Vladimir Putin do të përpiqet të bartë luftën edhe në Ballkanin Perëndimor për ta kthyer në fushëbetejë me demokracitë perëndimore”, ka shtuar Kurti.
Po ashtu, Kurti tregoi se shtetet e BE-së dhe NATO-s duhet që të angazhohen më shumë për largimin rus nga Ballkani./teve1.info/
