Edhe pse kolonat e gjata shkaktuan frustrim të madh tek qytetarët, sipas Krasniqit, këto bllokime e testime janë normale dhe të nevojshme për qytetin, raporton teve1.info.
“Këto bllokime janë normale, për shkak se duhet të bëhen këto testime në mënyrë që të vijmë deri te vlerësimet për zgjedhjen më të mirë të qarkullimit të trafikut. Mirëpo, a ka pas hapësirë të gjendet ndonjë formë tjetër?, ndoshta njoftimi duhej të bëhej disa ditë më herët, jo në kohën kur u bë. Për mua më shqetësuese është që u bllokuan shërbimet emergjente brenda qytetit, domethënë të gjitha rrugët që të dërgonin tek spitalet ishin të bllokuara. Pra, shqetësimi im do të adresohej që rrugët, kolonat dhe shiritat rrugorë të cilët janë të destinuar për qarkullimin e mjeteve emergjente, sot fatkeqësisht ishin të zëna gjatë gjithë kohës”, deklaroi Krasniqi në emisionin “Infonata” në Tëvë1.
Më tej, eksperti i komunikacionit vlerësoi se Komuna e Prishtinës është duke e bërë një punë të jashtëzakonisht të mirë në kryeqytet.
Kujtojmë se një testim i tillë ishte bërë edhe në fund të muajit maj.
Komuna e Prishtinës ka njoftuar se qëllimi kryesor i gjithë procesit është zgjidhja afatgjate e lirimit të hapësirave të lëvizjes për këmbësorë sipas rekomandimeve të task forcës rrugore, si dhe lirimi i mbingarkesës së trafikut rrugor./Tëvë1.info/
