Ajo përmes një postimi në Facebook ka njoftuar se me kryediplomatin turk ka biseduar për rritjen e bashkëpunimit në mes Kosovës dhe Turqisë në fushën e politikës së jashtme dhe mbrojtjes si dhe hapat për të nxitur investime të ndërsjella mes dy vendeve, shkruan teve1.info.
“Me ministrin Mevlüt Çavuşoğlu zhvilluam një bisedë përmbajtjesore për rritjen e bashkëpunimit në mes të dy vendeve tona në fushën e politikës së jashtme, mbrojtjes, si dhe hapat përpara për t’i nxitur investimet e ndërsjella”, tha Osmani.
Presidentja Osmani gjatë takimit me ministrin turk ka përsëritur qëndrimin se anëtarësimi i Kosovës dhe rajonit në strukturat euroatlantike është domosdoshmëri.
“E vlerësoj maksimalisht mbështetjen e qartë të presidentit Erdoğan ndaj anëtarësimit të Kosovës në NATO dhe organizata të tjera ndërkombëtare. Mbështetje të tillë nga Turqia na duhet edhe për anëtarësimin e Kosovës në Këshillin e Evropës.Marrëdhëniet e Kosovës me Turqinë janë strategjike dhe se ky shtet është ndër partnerët tanë kryesor në NATO. Komuniteti turk në Kosovë dhe mërgata e madhe shqiptare në Turqi janë urë e fortë ndërmjet dy shteteve”, thuhet në komunikatën e presidencës.
Ndërkohë gjatë ditës së sotme, Ministri i Punëve të Jashtme të Republikës së Turqisë, Mevlut Cavusoglu është pritur edhe nga zëvendëskryeministrja e Republikës së Kosovës, njëherësh ministre e Punëve të Jashtme dhe Diasporës, Donika Gërvalla me të cilën ka mbajtur edhe një konferencë për media./Teve1.info
