Për korridore e salla të ndryshme të Ministrisë, dikasteri i kryesuar nga Rifat Latifi, bleu tepihë në vlerë prej 9 mijë e 870 euro.
Këto tepiha planifikohet të dorëzohen brenda 2 muajve.
“160 tepihë të kualitetit të lartë për sallën nr. 128 dhe zyrën nr. 116. Kurse, 410 tepihë rrugorë të kualitetit të lartë për koridoret e objektit të MSh-së. Afati kohor i dorëzimit të tyre është 45 ditë nga koha e lëshimit të urdhër blerjes nga ana e Autoritetit Kontraktues”, thuhet në kontratë.
Në kushtet e tyre parashihet edhe rezistenca e materialit ndaj zjarrit.
Mirëpo, se si do të duken ato, Ministria e Shëndetësisë ia ka besuar furnizuesit.
“Ngjyra e tepihave do të përzgjedhet nga Autoriteti Kontraktues. Operatori Ekonomik fitues është i obliguar që tepihët aktual të vendosur në koridore, sallë dhe zyrën e Sekretarit te Përgjithshëm, t’i heq, t’i pastroj hapësirat dhe të vendosen tepihët e ri. Në kuadër të vendosjes së tepihave duhet të përfshihet edhe ngjitësi adekuat si dhe qepjet e nevojshme.”
Krahas këtyre shpenzimeve, ndaj Ministrisë së Shëndetësisë, vazhdimisht janë hedhur kritika dhe ankesa për moskryerjen e pagesave në afatet e parapara për specializantët e angazhuar.
Kronika e realizuar nga Florijeta Dërnjani.
