I shoqëruar nga Presidentja, Vjosa Osmani, Kurti tha se do të angazhohen për drejtësi, për viktimat, dëmet e vuajtjet që i janë shkaktuar në Kosovë gjatë kohës së luftës, shkruan teve1.info.
“Do të insistojmë e angazhohemi për drejtësi për të gjitha viktimat, për të gjitha dëmet e vuajtjet që na janë shkaktuar. Në këtë mënyrë bashkë me popullin e Kosovës, i cili është i jashtëzakonshëm e kemi të sigurte dhe shumë më të mirë të ardhmen përpara”, tha ai.
Ndër të tjera, Kurti e ngriti lartë figurën e Presidentit, Ibrahim Rugova duke thënë se ai ka qenë intelektual i angazhuar i cili ka dhënë kontribut të jashtëzakonshëm për ndërkombëtarizimin e çështjes shqiptare e të Kosovës në kohën e okupimit të Serbisë.
“Ne sot shënojmë çlirimin e vendit, paqen në Kosovë, lirinë e popullit dhe në të njëjtën kohë kujtojmë ata që kontribuan, punuan, u flijuan që ne të jemi edhe të gjallë edhe të lirë edhe me mundësi për përparim. Nuk mund ta paramendojmë humanitetin, durimin, qetësinë në politikë pa presidentin Ibrahim Rugova, i cili para se të bëhej president për herë të parë këtu e 30 vjet më parë ishte intelektual i angazhuar i cili me insistimin e tij dha kontribut të jashtëzakonshëm për ndërkombëtarizimin e çështjes shqiptare e të Kosovës në veçanti në kohën e okupimit të egër të Serbisë që kulmoi me gjenocidin kundër popullit tonë”, theksoi kryeministri.
