Pas shumë muajve, pacientët po drejtohen përsëri Klinikës Infektive për shkak të koronavirusit.
Madje, dy persona të cilët kanë qenë të infektuar me Covid-19 kanë ndërruar jetë.
Sipas drejtorit të Klinikës Infektive, Arben Vishajt, të dy kishin sëmundje të rënda kronike.
Por, Vishaj pranon që së fundmi është rritur edhe numri i pacientëve të shtrirë në këtë klinikë.
“Aktualisht në Klinikën Infektive janë të spitalizuar 10 pacientë dy nga ta janë me oksigjenoterapi, dy ditë më parë në Klinikën Infektive dy pacientë kanë përfunduar me vdekje, njëri në moshën 80 vjeçare i cili ka qëndruar në Klinikën Infektive dy orë pasi ka pasur sëmundje të rënda kronike, kurse një pacientë në moshën 67 i cili lëngonte nga sëmundje të rënda kronike që ishte duke trajtuar më përpara në Klinikën Infektive”, shprehet Vishaj.
E përveç në Klinikën Infektive, edhe nëpër Qendrat e Mjekësisë Familjare, personat e infektuar me këtë virus po kërkojnë ndihmë.
“Edhe në Qendrën Kryesor Familjare kemi pasur raste, vetëm në muajin e fundit të evidentuar janë 4 raste me COVDI-19 ndoshta ka pasur raste edhe të tjera që nuk janë deklaruar por ne kemi marrë masa dhe jemi konsultuar edhe me IKSHPK dhe raste të tilla trajtohen sikurse rëndomta më sëmundje virusale”, thotë Remzi Shala, drejtor në QKMF-në e Fushë – Kosovës
Madje sipas infektologut, Hamdi Ramadanit, rreziku nga koronavirusit është permanent.
Por ai ka një kërkesë për qytetarët dhe institucionet.
“Masat anti Covid janë tepër më rëndësi, higjiena si ajo personal dhe kolektive është shumë e rëndësishme, një distancë një ose dy metra sidomos në vendet e më grumbullim të qytetarëve si kafëteri dhe tregje është shumë i rëndësishme, si dhe vaksinimi duhet të vazhdojë me atë planin kundër pandemisë COVID-19”, tha Ramadani.
Nga Klinika Infektive thonë se situata me COVID-19 për momentin është nën kontroll dhe se nuk ka nevojë për panik.
