Ahmeti duke kujtuar një thënie që e përdorin në Vetëvendosje, “Njolla në fanellën e bardhë shihet më shumë”, ka thënë se pavarësisht se e vërteta nuk është zbardhur rasti është një njollë për qeverinë.
Ai përmes një postimi në Facebook, ka thënë se Berishaj duhet të shkarkohet.
“Njolla në fanellën e bardhë shihet më shumë – kemi thënë shpesh në VV. “Prandaj duhet të jemi dhjetë herë më të kujdesshëm kur jemi në qeveri” dëgjohej shpesh në mbledhjet me numra romak në Këshillin e Përgjithshëm. Nuk e di se a ka dorëzuar Martin Berishaj 600 mijë euro në Slloveni. Por që është njollë – është – qoftë edhe për deklarim të rrejshëm të pasurisë. Krahasimi me qeveritë e kaluara është si fanela e bardhë me atë me ngjyrë. Që kjo mos të bëhej kaq e madhe z. Berishaj do të duhej të dorëhiqej. Edhe në qoftë se është i pafajshëm, që ti hap rrugë hetimeve. E presidentja e posaçërisht kryeministri nuk kanë nevojë ta mbrojnë verbërisht, por vetëm të thirren në hetim e qartësim. Kështu edhe pastërtia do të ishte më e madhe”, ka shkruar Ahmeti.
Ai po ashtu ka folur edhe për kritikat e opozitës për këtë rast dhe teoritë e tyre për një skemë ndërkombëtare energjetike, të cilat i ka quajtur të tepërta.
“Teoritë e opozitës për një skemë ndërkombëtare energjetike janë zgjatim i tepërt – stretching it to far thojnë anglisht. Edhe po të jetë z. Berishaj “sekser” i Hamoviqit e Fazliqit, vështirë se është skemë e organizuar nga Albini. Prandaj edhe qytetarët e posaçërisht votuesit e qeverisë çkyçen kur dëgjojnë teori të tilla nga Abelardi et co. Opozita do të fitonte shumë më shumë pikë po të fokusohej në shkeljet ligjore në Kosovë nga Z. Berishaj dhe me të drejtë në hetimin parlamentar për ngjarjet në energjetikë. Në këtë moment edhe qeveria do të përfitonte shumë nga ky hetim”, ka shkruar Ahmeti
Dorëheqja e ambasadorit Berishaj është kërkuar edhe nga shoqëria civile./teve1.info/
