Janë nisur së bashku drejt vendit ku pushojnë 45 martirë të masakrës më me jehonë në luftën e fundit në Kosovë.
Presidentja, kryeministri në detyrë e kryetari i Kuvendit nderuan me homazhe civilët të vrarë 15 janarin e vitit 1999.
Ata vazhduan përgjatë gjithë komplekset duke vizituar varrezat e tyre.
As këtë herë nuk mungoi Ish-shefi i misionit vëzhgues të OSBE-së në Kosovë, ambasadori Uilliam Ualker.
Në atë kohë ai e pati cilësuar Masakrën e Reçakut si krim kundër njerëzimit.
Kryeministri në detyrë, Albin Kurti tha se pas kësaj masakre u vetdijësua opinioni ndërkombëtar rreth Kosovës dhe se kësaj plage ende i mungon drejtësi.
“Jemi këtu së bashku, si krerë të institucioneve, me kryetarin e komunës, me kolegë nga qeveria dhe parlamenti, si dhe me zyrtarë të tjerë shtetërorë, për të shprehur dhembjen tonë për këtë plagë të hapur, të së cilës ende i mundon drejtësia, por njëkohësisht edhe përkushtimin tonë se gjithmonë do të jemi të angazhuar për t’i sjellë kriminelët para gjyqit për t’i ndëshkuar ata për mizoritë para 27 vjetësh. Lavdi 45 martirtëve Reçakut dhe 11 dëshmorëve të kombit, të udhëhequr nga komandanti Ahmet Kaçiku”, tha Kurti.
Derisa presidentja Osmani deklaroi se Reçaku mbetet dëshmi e qartë e qëllimit shfarosës të regjimit gjenocidal të Serbisë ndaj popullit të Kosovës.
“Në këtë 27 vjetor të masakrës së Reçakut edhe një herë përkujtojmë të gjitha viktimat e kësaj masakre të llahtarshme, e cila sërish dëshmoi qëllimin shfarosës që regjimi gjenocidal i atëhershëm i Serbisë kishte ndaj popullit të Kosovës. Reçaku dhe plagët e Raçakut akoma flasin, sepse dhimbja është ende e freskët siç ishte para 27 vitesh”, u shpreh Osmani.
Kurse, kryeparlamentari në detyrë, Dimal Basha u shpreh se kjo masakër mbetet nga krimet më të rënda të kryera ndaj popullit shqiptar.
“Së bashku me Presidenten Osmani dhe Kryeministrin Albin Kurti jemi këtu për të bërë homazhe dhe për të kujtuar martirët e Reçakut. Mediat botërore në këtë vend patën pasqyruar njëkohësisht edhe fytyrën barbare me tendenca gjenocidale të Serbisë ndaj një populli të pafajshëm shqiptar”, tha Basha.
Këtë masakër gjatë ditës e përkujtuan edhe krerë të partive tjera politike, organizata ndërkombëtare që operojnë në Kosovë por edhe qytetarë të shumtë që ishin për vizitë në kompleksin memorial.
