Shefja e UNMIK-ut, Caroline Ziadeh, i ka bërë thirrje Kosovës e Serbisë që të marrin masa depërshkallëzuese në veri, raporton teve1.info
Në seancën e Këshillit të Sigurimit të OKB-së që po mbahet për Kosovën, Ziadeh po ashtu u ka bërë thirrje Kosovës dhe Serbisë që të angazhohen në mënyrë konstruktive në dialog.
Ajo e filloi fjalimin e saj duke përmendur sulmin në Banjskë të Zveçanit ku u vra rreshteri i Policisë së Kosovës, Afrim Bunjaku.
“Është thelbësore që hetimet që po zhvillohen aktualisht të ofrojnë mundësinë për të dokumentuar me fakte këto ngjarje dhe për t’i mbajtur autorët përgjegjës”, tha Ziadeh.
Ndërsa sa i përket takimit të 14 shtatorit në Bruksel, Ziadeh tha se ky takim nuk prodhoi konsensus.
“Kjo ishte një mundësi e humbur për t’u angazhuar në mënyrë konstruktive drejt një programi për zbatimin e angazhimeve përkatëse të palëve sipas marrëveshjeve të arritura në Bruksel dhe Ohër në fillim të këtij viti”, deklaroi Ziadeh.
Megjithatë, shefja e UNMIK-ut tha se shpreson që vizitat e “pesëshes së madhe” në Prishtinë e Beogradit më 21 tetor, do të kenë rezultat.
Ziadeh tha se e vetmja rrugë përpara është dialog.
