Presidentja e Kosovës, Vjosa Osmani ka pritur sot në takim zëvendëspresidentin e Parlamentit Evropian, Rainer Wieland.
Përmes një komunikate për media, është bërë e ditur se në takim është diskutuar për procesin inagurues të Kosovës në Bashkimin Evropian, po ashtu edhe për zhvillimet e fundit në vend e rajon, raporton teve1.info
“Në takim u bisedua për procesin integrues të Republikës së Kosovës në Bashkim Evropian, si dhe zhvillimet e fundit në vend dhe rajon. Presidentja Osmani shprehu mirënjohjen e Kosovës për mbështetjen e vazhdueshme të Parlamentit Evropian për integrimin e Kosovës në BE, ndërsa ka ritheksuar nevojën që kjo mbështetje të vazhdojë”, thuhet në komunikatë.
“Ndër të tjera, Presidentja Osmani ka potencuar përkushtimin e palëkundur të popullit dhe institucioneve të Republikës për integrim në Bashkimin Evropian, e reflektuar edhe në bashkërendimin e plotë me politikat e jashtme dhe të sigurisë me ato të BE-së. Tutje, Presidentja Osmani ka folur mbi angazhimin e Republikës së Kosovës për paqe dhe stabilitet afatgjatë në rajon”, thuhet më tej.
