Ka filluar seanca në Gjykatën Themelore në Prishtinë, kundër ish kryeshefit të KPM-së, Luan Latifi, i akuzuar për korrupsion, raporton teve1.info
Në këtë seancë do të dëgjohen provat materiale, disa audio incizime të Prokurorisë ku pretendohet se dëgjohet biseda e Latifit me pronarin e kompanisë Telkos, Elhami Haziri.
Po ashtu, në këtë seancë pritet të merret edhe vendimi ndaj Latifit.
Aktakuza e ngritur më 15 shtator 2021, ngarkon Luan Latifin se në cilësinë e kryeshefit të Komisionit të Pavarur për Media (KPM) dhe Arben Bilalli, në cilësinë e drejtorit të Administratës dhe Financave në KPM, gjatë qershorit 2021, kishin kërkuar dhe marrë ryshfet shumën prej 8 mijë euro nga i dëmtuari Elhami Haziri, pronar i kompanisë “Telkos”.
Në aktakuzë thuhet se ky ryshfet ishte pranuar nga ana e të akuzuarve me qëllim që kompanisë “Telkos”, të mos i shqiptohet gjobë për shkak se e njëjta kishte bërë shkelje ligjore duke bërë shtrirje të rrjetit në disa vende për të cilat nuk e kishte njoftuar KPM-në.
Në seancën e mbajtur më datë 25 korrik 2022, Bilalli kishte pranuar fajësinë, dhe ishte veçuar procedura ndaj tij, ndërsa Latifi ishte deklaruar i pafajshëm.
Raport nga Florijeta Dernjani
