Historiani Jusuf Buxhovi, i ftuar në InfoNata në Tëvë 1 ka folur edhe për procesin që po zhvillohet në Hagë ndaj ish-krerëve të UÇK-së.
Buxhovi nuk mendon se UÇK ka qenë strukturë e organizuar përderisa thotë se rolin e UÇK-së së organizuar e kanë krijuar ndasitë dhe lufta për pushtet.
“Unë po flas si historian dhe unë e kam thanë në fillim se nuk ka UÇK me strukturë të organizuar, po më shumë atë që e ka thënë Rugova në Hagë se kanë qenë struktura vullnetare të cilat në një moment të caktuar të represionit kanë rrok armët me e mbrojt vendin e vet, ashtu unë mendoj. Ato dhe rolin e UÇK-së të organizume jashtë institucionale e kanë kriju ndasitë dhe lufta për pushtet e cila ka qenë tragjike. Ju e dini që janë vra njerëz edhe gjatë edhe pas asaj”, ka thënë Buxhovi.
Buxhovi thotë se duhet të ndahet qartë përgjegjësia individuale dhe kolektive kur bëhet fjalë për këtë gjykim.
“Unë mendoj se duhet me u nda përgjegjësia individuale prej asaj kolektive. Por nëse na mendojmë që përgjegjësia kolektive po na bjen se ndodhë në këtë diskursin e këtyre marsheve, etj atëherë do t’i bëjmë dëm pikërisht historisë sepse nëse ta zëmë do të gjendet ndonjë fajësi apo do të dënohen, atëherë ti vetvetiu po thu se po na dënojnë strukturat tona dhe UÇK-në. Kjo do të duhej ky diskurs të largohet. Nëse dikush ka bo një faj, drejtësia le të thotë fjalën e vet”, shton ai.
Buxhovi thotë se historia që do të shkruhet në vitet e mëvonshme do të mbështetet nga epilogu i procesit të Hagës.
“Historia prej historianëve që ka me u shkru, ka me u mbështetë në Hagë, prej epilogut të saj ka me qenë sepse historianët e huaj e marrin atë që thotë Haga. Na për historinë e nazi-fashizmit të gjithë ato që kanë ndodh e kemi prej procesit të Nurnbergut. Uroj që UÇK-ja si pjesë e rezistencës institucionale të dalë e pastër. Por kjo nuk do të thotë që në kuadër të asaj lufte të drejtë që nuk janë infiltru elemente të ndryshëm”, ka deklaruar Buxhovi.
