Para Komunës së Prishtinës, dolën në protestë edhe mëngjesit e së martës.
Punëtorët e “Trafikut Urban” kërkuan që mjetet financiare të dalin në xhirollogaritë e tyre.
Madje, në rast të vonesave ata paralajmëruan që do të radikalizojnë veprimet.
Edhe operatorët privatë thanë që kjo gjendje po ia vështirëson jetën banorëve të kryeqytetit.
Prej “Hajvalisë” e deri në qytet nuk ka shanc para 40 minutave me mbërri deri të rrethi e mos të flasim edhe në qytet. Është problem e vështirësi se edhe me fëmijë se si do të shkojnë në shkollë si do të kthehen nga aty. Sipas udhëtarëve po duhet me mjetet e tyre personale me i dërguar në mëngjes e me ndërpre punën e me ardh me i marr fëmijët kjo është një vështirësi e madhe shumë, por nuk është faji jonë, tha Gani Sinani nga linja “24 Yjet”.
Për krejt këtë situata, Komuna e Prishtinës, e fajëson Ministrinë e Financave.
“Ne mendojmë që Ministria e Financave është dashur që të enjten të filloj me proces të alokimit të buxhetit pas vendimit të Kuvendit Komunal, kanë mundur që zyrtarët të punojnë dhe ditën e premte dhe gjatë vikendit sepse ligji e lejon e dinë që jemi në gjendje të jashtëzakonshme. E në rastet kur kemi situatë të jashtëzakonshme institucionet duhet të sillen konfrom asaj situate dhe të bëhet zgjidhje sa më shpejt”, tha gjatw ditës Shkwmb Manaj nënkryetar i komunws.
E pasditen e së martës, përmes një njoftimi Ministri në detyrë i Financave, Hekuran Murati tha se tashmë janë alokuar 2.7 milionë euro në kategorinë e mallrave dhe shërbimeve, mjete të cilat janë të destinuara për pagesën e operatorëve të transportit publik në Prishtinë.
Murati ka thënë se këto mjete janë proceduar veçmas nga pjesa tjetër prej 25.9 milionë eurove të projekteve kapitale.
“Prandaj është për keqardhje sjellja e deklaratat dezinformuese nga ana e Komunës së Prishtinës që gjoja Ministria nuk po bën alokimin e mjeteve, kur në fakt edhe ata vetë e dinë që kemi të bëjmë me procedura që nuk mund të tejkalohen. Gjithsesi, uroj që komuna të ketë vlerësuar saktë obligimet financiare në kategorinë mallra dhe shërbime, kur ka vendosur të ndajë vetëm 2.7 milionë euro, dhe tash të shlyejë të gjitha borxhet që ka ndaj operatorëve të transportit publik, e me këtë të marrë fund edhe farsa për gjoja bllokadën e pretenduar”, njoftoi Murati.
Daljen e mjeteve e ka mirëpritur i pari i Komunës, Përparim Rama duke thënë se shpreson që të bëhet alokimi i shumës prej 25 milionë eurosh.
Ndërkohë, Ilmi Gashi nga Trafiku Urban ka thënë që janë duke pritur ti dalin mjetet në llogari për të parë se si do të veprojnë tutje.
Ai tha që detaje tjera do të japin të mërkurën në mëngjes.
