Kryeministri i vendit, Albin Kurti, ka pritur në takim ambasadorin e Italisë në Kosovë, Antonello De Riu.
Gjatë takimit mes palëve, thuhet se kanë riafirmuar vazhdimësinë e marrëdhënieve të frytshme mes Kosovës dhe Italisë, derisa De Riu ka theksuar që Italia është njëra nga shtetet më afatgjate që ka kontribuar në Kosovë.
“Kryeministri i Republikës së Kosovës, Albin Kurti, bashkë me Zëvendësministren e Arsimit, Shkencës, Teknologjisë dhe Inovacionit, Edona Maloku Bërdyna, zhvilluan takim me Ambasadorin e Italisë në Kosovë, Antonello De Riu, i cili shoqërohej nga Majlinda Bregasi, profesoreshë e gjuhës italiane në Fakultetin e Filologjisë në Universitetin e Prishtinës. Gjatë takimit u riafirmua vazhdimësia e marrëdhënieve të frytshme ndërmjet Kosovës dhe Italisë, me fokus të veçantë tek zgjerimi i shtrirjes së gjuhës dhe kulturës italiane në Kosovë. Në këtë kuadër, Ambasadori De Riu theksoi se Italia ka qenë dhe vazhdon të jetë një prej shteteve me kontributin më të madh afatgjatë në Kosovë, që nga prania e qëndrueshme e KFOR-it italian e deri tek mbështetja financiare për projekte e procese të tjera zhvillimore në Kosovë”, thuhet në komunikatë.
Më tej, kanë diskutuar edhe potencialin e zhvillimit të një programi të ri për gjuhën dhe kulturën italiane në Universitetin e Prishtinës, i cili do të kishte në qendër gjithashtu edhe fushën e komunikimit.
Njëherit, Kryeministri Kurti konfirmoi mbështetjen e Qeverisë së Kosovës për iniciativat si kjo që vijnë nga shteti mik i Italisë, duke nënvizuar rëndësinë historike, strategjike e kulturore të Republikës së Italisë për Kosovën dhe rrugëtimin e saj./teve1.info/.
