Virusi Covid-19, po vazhdon të jetë prezent në Kosovë.
Instituti Kombëtar i Shëndetësisë Publike, së fundmi ka njoftuar për raste pozitive, por fatmirësisht, të njëjtat nuk kanë qenë më fatalitet në shifra, sikurse para gati 4 vitesh.
“Në dy javët e fundit (15.11.2023 – 28.11.2023) në Kosovë janë raportuar 13 raste pozitive dhe asnjë rast i vdekjes me COVID-19. Sipas grup-moshave rezulton se numri më i madh i rasteve i takon grup-moshës 50-59 dhe 60-69 vjeç (me nga 3 raste) me moshë mesatare 57 vjeç. Aktualisht janë 4 raste aktive”, thuhet nga IKSHPK.
Nga Covid-19, për dallim nga viti 2020, në Klinikën Infektive tashmë nuk është asnjë pacient i shtrirë.
Qytetarë të infektuar me coronavirus, nuk janë paraqitur as në Qendrën Kryesore të Mjekësisë Familjare në Prishtinë.
Por edhe pse rastet kanë rënë, drejtori i klinikës infektive në QKUK, Arben Vishaj, kërkon që qytetarët të kenë kujdes.
Sipas Ogranizatës Botërore të Shëndetësisë, së paku 7 milionë njerëz kanë vdekur në pandemi, ndërsa janë konfirmuar më shumë se 765 milionë infeksione në mbarë botën.
