Nga pamjet e gazetares së Teve1, Albiona Hajdari, shihet se mjetet e rënda janë larguar, derisa rruga ku ishin të vendosura është liruar për qarkullim.
Rruga e cila ishte mbyllur përkohësisht, tashmë është liruar në njërën korsi për qarkullim të qytetarëve.
Njoftimin për mbylljen përkohësisht të rrugës e ka bërë edhe Policia e Kosovës përmes një publikimi në Facebook pak orë më parë.
“Policia e Kosovës përmes këtij njoftimi zyrtar bën të ditur se sot njësitet e KFOR-it do të largojnë mjetet e rënda (kamionët) e dëmtuar, të cilët kanë qenë të vendosur në lokacionin e quajtur “Përroi i Zhazhës”.
Për shkaqe pune dhe sigurie, nga mëngjesi një korsi e rrugës mbyllet për qarkullim, përderisa në mesditë përreth dy orë do të mbyllet komplet rruga për qarkullim në drejtimin Mitrovicë – Jarinje, deri sa të largohen mjetet e rënda, për t’u mundësuar qarkullimin dhe lëvizjen e lirë të mjeteve dhe qytetarëve.
Përgjatë kësaj kohe njësitet policore do të asistojnë KFOR-in, si dhe do të ri-orientojnë trafikun”, thuhet në njoftimin e Policisë.
Kamionët dhe mjetet tjera të rënda që u larguan, ishin vendosur si barrikadë nga serbët veriorë të Mitrovicës, javë më parë.
