Tash e 10 muaj, studentët e Serbisë po qëndrojnë rrugëve.
Ata përmes këtyre protestave masive në disa qytete po kërkojnë zgjedhje të parakohshme në tërë vendin.
E për të larguar vëmendjen nga këto protesta, regjimi atje mund të ketë skenarë de-stabilizuese në drejtim të Kosovës, thotë ish ambasadori i Shqipërisë në OKB, Agim Nesho.
“Destabilizimi kryesori vjen nga regjimi nacionalist i Vuciqit i cili dëshpërimisht kërkon që të dalë nga loja e brendshme kur populli dhe studentët janë ngritur kundër dhe kërkojnë ndryshim të regjimit. Zakonisht regjime të tilla nacionaliste kërkojnë që të transferojnë çështjen me konflikte të jashtme, duke ngritur ndjenjat nacionaliste për hir të mbrojtjes së interesave të vendit. Këto dihen që janë skenarë të fuqive nacionaliste, për aq më tepër që Serbia nuk është gjë tjetër veç se një satelit i Rusisë, një vend i cili ka importuar gjithë skenarin e mbrojtjes së hapësirave ruse dhe ne për më shumë se tre katër vjet kemi parë të gjitha iniciativat që janë zhvilluar edhe në Beograd në bashkëpunim me Republika Srpskan”, deklaroi Nesho.
Sipas Neshos, madje provokimi kryesor i Serbisë ka qenë sulmi terrorist në Banjskë të Zvecanit para dy viteve.
Ky sulm, sipas tij, u bë për të parë se si do veprojë Evropa dhe Kosova.
E ditëve të fundit, në Kosovë pati grafite edhe kundër kryeministrit në detyrë, Albin Kurti.
Por që të njëjtat janë pa ndikim të madh thotë ligjëruesi i medias dhe konfliktit, Abit Hoxha.
“Grafitet janë vetëm konsekuencë e raporteve Kosovë-Serbi dhe nuk e ndryshojnë situatën në mes Kosovës dhe Serbisë. Pra konkretisht, grafitet janë konsekuencë e marrëdhënieve Kosovë-Serbi, prandaj nuk kanë pas ndonjë ndikim aq shumë të madh pra dikush personalisht ka dalë dhe i ka shkru ato grafite qysh dalin edhe i shkruajnë edhe në jug edhe në veri”, deklaroi Hoxha.
Më 24 shtator të vitit 2023 në Banjskë të Zvecanit ndodhi një sulm i armatosur terrorist ku mbeti i vrarë rreshteri i Policisë së Kosovës, Afrim Bunjaku.
