Ministri i Jashtëm turk Hakan Fidan, Ministri i Mbrojtjes Kombëtare Yasar Guler dhe shefi i inteligjencës Ibrahim Kalin kanë qëndruar të hënën në një vizitë pune në kryeqytetin sirian, Damask.
Ata u takuan me presidentin sirian, Ahmad al-Sharaa dhe zyrtarë të tjerë sirian, sipas informacioneve të marra nga Ministria e Jashte e Turqisë, transmeton Anadolu.
Takimet pritet të vlerësojnë në mënyrë gjithëpërfshirëse trajektoren e marrëdhënieve Turqi-Siri gjatë vitit të kaluar në të gjitha dimensionet politike, ekonomike dhe të sigurisë, pas përvjetorit të parë të përmbysjes së regjimit të Bashar Assad.
Diskutimet do të përqendrohen gjithashtu në progresin e zbatimit të marrëveshjes së 10 marsit, e cila është e lidhur ngushtë me prioritetet e sigurisë kombëtare të Turqisë.
Vizita pritet gjithashtu të trajtojë rreziqet e sigurisë në Sirinë jugore që rrjedhin nga veprimet agresive të Izraelit.
Përveç çështjeve të sigurisë, të cilat do të përbëjnë fokusin kryesor të bisedimeve, axhenda përfshin një shqyrtim të projekteve dypalëshe që po kryhen për rindërtimin e Sirisë dhe një vlerësim të përpjekjeve për të mbështetur iniciativat e qeverisë siriane për ndërtimin e kapaciteteve.
Zëvendësministri i Jashtëm Nuh Yilmaz, i cili është emëruar ambasador i Turqisë në Damask, do të udhëtojë gjithashtu për në kryeqytetin sirian.
