Kryetari i Sindikatës së Shërbyesve Civilë, Mursel Zymberi, ka thënë se edhe në Ditën Ndërkombëtare, shërbyesit civilë kanë brengën e mostrajtimit të barabartë në raport me të punësuarit në shërbimin publik.
Zymberi, thotë se ka ligje që në situata të caktuara kanë filluar të denigrojnë ose të cenojnë rëndë dinjitetin e shërbyesve civilë.
“Këshilli sot ka dhënë pasqyrën e ankesave nga më të ndryshmet, por brenga e shërbyesve civilë në përgjithësi është mos trajtimi i barabartë në raport me gjithë të punësuarit në shërbimin publik të Kosovës. Realisht ka ligje që në situata të caktuara kanë filluar të denigrojnë ose të cenojnë rënd dinjitetin e shërbyesve civilë”, tha ai në emisionin “Ditari” në Tëvë1.
Gjithashtu, Zymberi përmendi pagën e shërbyesve civilë, ku tha se ligji i tyre nuk është i favorshëm për ta, sepse sipas tij është shikuar mbi bazën e koeficientit.
“Kemi një ligj të pagave që nuk është i favorshëm për shërbimin civilë ngase është shikuar mbi bazën e koeficientit. Në shërbimin civilë kemi vlerën më të ulët të koeficientit, që nënkupton. Koeficienti më i lartë është diku deri në 7.5 dhe në sektorët e tjerë kjo ndoshta është niveli më i ulët i koeficientit. Plus edhe vlera e koeficientit në momentin e fundit qeveria duke e promovuar në fillim se do të jetë vlera e koeficientit në 120 euro e zbriti në 105, dhe kjo e dëmtuar në masë edhe më të madhe dhe tek shumica e shërbyesve civilë kemi një rritje simbolike të përkthyera në vlerën monetare nga 8 euro në 10, 12 euro”, tha ai.
Zymberi tha se në përgjithësi shërbyesit civilë nuk janë të kënaqur me nivelin e pagave dhe trajtimin.
23 qershori, Dita e Shërbyesve Civilë, në botë ka filluar të shënohet me vendim nga Asambleja e Përgjithshme e Kombeve të Bashkuara më 20 dhjetor 2002, kur kjo ditë është caktuar si datë tradicionale për shënimin e Ditës së Kombeve të Bashkuara për Shërbyesit. /teve1.info/
