Në stadiumin “Fadil Vokrri” në Prishtinë, Kombëtarja e Zvicrës në futboll, do ta ketë përkrahjen e 900 shikuesve në ndeshjen kundër Kosovës.
Kështu kanë njoftuar mediumet zvicerane, duke bërë të ditur se ekipi i tyre nuk do të jetë vetëm në stadiumin “Fadil Vokrri”.
Ndeshja Kosova – Zvicra, do të zhvillohet sot martën nga ora 20:45 dhe është e fundit kualifikuese për Kupën e Botës 2026.
“Federata Zvicerane e Futbollit pret rreth 900 tifozë të ekipit përfaqësues në stadiumin Fadil Vokrri në Prishtinë të martën, kur Zvicra synon të sigurojë vendin e saj në finalet e Kupës së Botës. Përveç afërsisht 600 tifozëve në seksionin mysafir, rreth 300 miq, familjar dhe mysafirë VIP do të jenë atje për të mbështetur ekipin e Murat Yakinit”, shkruan “Blick”.
Zvicra është e para në grup me 13 pikë, 3 më shumë se Kosova që renditet e dyta dhe tashmë ka të garantuar pjesëmarrjen në fazën “play-off”.
