Pas Remo Freulerit, Kombëtares së Zvicrës do t’i mungojë edhe një mesfushor tjetër për ndeshjet e këtij muaji në kuadër të kualifikimeve për Botërorin 2026.
Bëhet fjalë për mesfushorin Vincent Sierro, i cili nuk do të paraqitet për Zvicrën në duelet ndaj Suedisë dhe Kosovës.
Sierro nuk do të luajë në dy ndeshjet e fundit kualifikuese të Grupit B për shkak të lëndimit, pasi federata zvicerane ka njoftuar se ai është larguar të hënën mbrëma nga grumbullimi.
Tashmë, selektori Murat Yakin do t’i ketë dy mungesa në mesfushë në dy duelet e fundit dhe përcaktuese të grupit, të cilit Zvicra i prinë me 10 pikë.
Zvicra, të shtunën luan në shtëpi kundër Suedisë, përpara se të përballet me Kosovën në Prishtinë, më datën 18 nëntor.
Tri pikë më pak se Zvicra në grup i ka Kosova, e cila renditet e dyta dhe është në garë për pozitën e parë dhe kualifikim direkt në Botërorin e vitit të ardhshëm.
