Numri i protestuesve serbë ditën e katërt të tensioneve ishte më i madh se ditëve të tjera në Zveçan
Ata shoqëroheshin nga këngë nacionaliste serbe.
Simbole të shtetit serb, protestuesit vendosën edhe në pengesat e vendosura nga KFOR-i.
E përtej tyre qëndronin pjesëtarë të KFOR-it, derisa në thellësi të perimetrit të sigurisë qëndronin edhe dy autoblinda të Policisë së Kosovës.
Një njësit i Policisë, në orët e pasdites në Zveçan, hyri në turmën e protestuesve, të cilët e sulmuan me mjete të forta.
Gazetarët të cilët po raportonin për këtë sulm ndaj Policisë, u sulmuan dhe u penguan nga disa protestues.
Pas këtij rasti, përfaqësues të Listës Serbe kërkuan të bisedojnë me KFOR-in.
Ata kërkuan që KFOR-i të ripozicionohej, në mënyrë që të mos lejohet qarkullimi i Policisë së Kosovës.
“Pak më herët një veturë e Policisë me armët e gjata kaloi këtu afër, dhe provokoi qytetarët. E qytetarët reaguan, dhe hodhën gurë në drejtim të veturës. Arsyeja pse erdhëm te ju. Nëse keni forcë që ushtarët e juaj të jenë këtu përreth, të mos vijë te kontakti mes Policisë e qytetarëve. Gjithë ditën luftojmë, qytetarët e gjithë ne të ruajmë paqen me çdo çmim. Por nëse nuk e mbyllni këtë rrugë, do të ketë fjalë për fjalë tensione”, tha Rakiq.
Mirëpo, kjo nuk u pranua nga KFOR-i, të cilët ia përmendën Rakiqit e Simiqit, sulmet e serbëve të hënën.
“25 ushtarë të KFOR-it janë plagosur. Disa prej tyre kishin plagë me armë zjarri. Disa ushtarë të KFOR-it janë plagosur nga arma e zjarrit, u janë nxjerrë plumba, jo shumë larg nga aty ku folëm të hënën mbrëma. Shenjat në plumba tregojnë se është shtënë me të nga një armë, të cilën nuk e ka NATO apo KFOR-i. Nuk lejojmë të përsërit ajo çfarë ndodhi të hënën”.
Disa orë më vonë, u takun sërish. Kësaj radhe brenda perimetrit të sigurisë. Por, që nuk u tregua se a u morën vesh diçka palët mes vete. Nga orët e pasdites numri i protestuesve u zvogëlua, derisa për ta u vendosen edhe tenda.
