Zëvendësministri i Ministrisë së Punëve të Jashtme dhe Diasporës, Kreshnik Ahmeti, gjatë vizitës së tij në Maltë është takuar me anëtarë të delegacionit të këtij vendi në Asamblenë Parlamentare të Këshillit të Evropës.
Ahmeti i njoftoi ligjvënësit maltezë se Anëtarësimi i Kosovës në Këshillin e Evropës është domosdoshmëri.
“Z. Ahmeti njoftoi nikoqirët mbi zhvillimet e fundit në Kosovë dhe përparimet në indekset e demokracisë, drejtësisë dhe sundimit të ligjit. Ai theksoi se anëtarësimi i Republikës së Kosovës në Këshillin e Evropës është domosdoshmëri dhe çdo zvarritje vetëm sa ua pamundëson qytetarëve të vendit çasjen në mekanizmat mbrojtës të Këshillit të Evropës, me theks të veçantë në Gjykatën Evropiane për të Drejtat e Njeriut”, thuhet në një njoftim të MPJD.
Po ashtu Ahmeti ka falënderuar deputetët “për mbështetjen e tyre të fuqishme për anëtarësimin e Republikës së Kosovës në Këshillin e Evropës”.
