Mesfushori Bledian Krasniqi do të jetë ardhja më e re te Kombëtarja e Kosovës edhe pse një gjë e tillë ende nuk është konfirmuar nga Federata e Futbollit të Kosovës (FFK).
Në fakt, skuadra e Zurichut, pjesë e së cilës është Krasniqi, ka bërë të ditur se 23-vjeçari tashmë ka njoftuar klubin zviceran për vendimin e tij.
Në njoftimin e Zurichut, thuhet se në momentin që të kompletohet dokumentacioni, Krasniqi do ta përfaqësoj Kosovën.
Zurichu ka thënë se i vjen shumë për një vendim të tillë të Krasniqit, të cilin e ka vlerësuar si lojtar të talentuar që tash e tutje nuk do të jetë në gjendje ta përfaqësoj Zvicrën.
Megjithatë, Zurichu ka thënë se e kupton vendimin e Krasniqit duke pasur parasysh se federata zvicerane deri më tani nuk ka treguar interesim që ta përfshijë në Kombëtaren A.
Krasniqi është rritur te Zurichu si futbollist, ndërsa ka luajtur për të gjitha gjeneratat e reja te Zvicra, prej Kombëtares U15 deri tek U21.
Këtë sezon me Zurichun, Krasniqi ka 2 gola e po aq asistime në 13 ndeshje kampionale.
