Kryenegociatori i Kosovës për anëtarësim në Bashkimin Evropian, Jeton Zulfaj, ka pritur në ndërtesën e Qeverisë së Kosovës Anton Hofreiter, kryetar i Komisionit për Çështjet e Bashkimit Evropian në Bundestagun Gjerman dhe deputet i Aleancës 90/Të Gjelbrit.
Sipas njoftimit, takimi vjen pas vizitës së Zulfajt në Bundestagun Gjerman javën e kaluar, ku ai ishte pritur nga Hofreiter.
Në vazhdimësi të diskutimeve të zhvilluara në Berlin, palët kanë diskutuar për procesin e integrimit evropian të Kosovës dhe mbështetjen e Gjermanisë në këtë proces.
Zulfaj ka theksuar se anëtarësimi i Kosovës në Bashkimin Evropian përbën interes strategjik të përbashkët për Kosovën dhe BE-në.
Ai ka vlerësuar mbështetjen e Gjermanisë për sigurinë dhe zhvillimin e Kosovës, duke thënë se vendi e ka shndërruar këtë mbështetje në ndërtimin e institucioneve demokratike dhe në forcimin e demokracisë.
Gjatë takimit është diskutuar edhe për harmonizimin e Kosovës me Politikën e Përbashkët të Jashtme dhe të Sigurisë të BE-së, si dhe për përkushtimin e vendit ndaj vlerave themelore të përcaktuara në nenin 2 të Traktatit për Bashkimin Evropian.
Zulfaj ka theksuar rëndësinë e mbështetjes dhe angazhimit të Bundestagut Gjerman për avancimin e Kosovës në procesin e integrimit evropian.
Në takim është diskutuar edhe për stabilitetin institucional dhe rëndësinë e funksionalitetit të institucioneve në zbatimin e reformave të nevojshme për avancimin e Kosovës drejt anëtarësimit në BE.
Sipas Zulfajt, funksionaliteti i Kuvendit është i domosdoshëm për përmbushjen e reformave të parapara në kuadër të Planit të Rritjes, në të kundërtën mund të rrezikohen fondet e dedikuara për reformat./teve1.info/
