Një zjarr i madh ka përfshirë gjatë natës shtëpinë e Driton Pllanës në fshatin Dolak të Vushtrrisë, duke shkaktuar dëme të konsiderueshme materiale dhe duke lënë familjen të tronditur.
Familjarët dyshojnë se shkak i zjarrit mund të ketë qenë problemi i vazhdueshëm me furnizimin me energji elektrike, përkatësisht tensioni i dobët në rrjet, për të cilin thonë se kanë ngritur shqetësime prej kohësh.
Sipas tyre, janë bërë vazhdimisht ankesa dhe kërkesa drejt KEDS-it për ndërhyrje në rrjetin elektrik. Ata pretendojnë se ekipet e kompanisë kanë dalë disa herë në terren, kanë kryer matje dhe kanë konstatuar problemet ekzistuese, madje duke përmendur edhe nevojën për intervenim emergjent.
“Kur qytetarët paralajmërojnë me kohë dhe institucionet nuk reagojnë, pasojat nuk mbesin vetëm materiale – ato prekin familje të tëra”, kanë deklaruar familjarët.
Të afërmit e përshkruajnë Driton Pllanën si një njeri punëtor dhe të përkushtuar ndaj familjes, i cili me shumë mund siguronte jetesën e tyre.
Banorët e zonës dhe familjarët kanë bërë thirrje që institucionet përgjegjëse dhe KEDS-i të ofrojnë mbështetje për familjen, në mënyrë që shtëpia të rindërtohet sa më shpejt.
