Autore: Jona Kelmendi
Në orën 21:00 të së mërkurës zjarrfikësit morën një thirrje për një zjarr që kishte përfshirë një banesë në rrugën “Isa Kastrati” pranë Parkut të Qytetit në Prishtinë.
Kur mbërritën panë që përmasat e flakëve ishin të mëdha, porse nuk u regjstrua asnjë i lënduar.
Megjithatë, zjarrfikësit thanë që shuarja e zjarrit nuk ishte aspak e lehtë.
“Është vërejt se është duke u dhezur kulmi i ndërteses, reagimi i zjarrëfikësve ka qenë shumë i shpejtë dhe profesionalë, ka bo që brenda 1h të lokalizohet ai zjarrë fatmirësisht nuk ka pasë të lëndum nga qytetarët as viktima jo. Vështirësi ka pasë në fikje të zjarrit ka qenë kogja vështirë sidomos nga pjesa e pasme e ndërtesës”, tha Abdusamet Shkodra – zëvendëskomandant i zjarrfikësve në Prishtinë.
Që ishte ndezur një zjarr në objekt e kishin vërejt edhe banorët, me ç’rast kishin dalur menjëherë nga banesa.
“Ju ka kallë kojshisë siper meje une kam qenë poshtë, gruaja e ka pa që është dhez zjarri edhe tek pjesa jonë edhe nuk kanë ditë sen veq i kanë marrë fmin edhe kanë dalë jashtë”, tha një banor.
E banorët e kësaj godine as të enjten nuk kanë mundur të rikthehen në banesat e tyre.
“Unë jetoj qetu në katin e 5 ndërmjet tij, nuk na kanë lanë me hi brenda se mu ka blloku dera e brendshme nuk e di as qka ka bë dëm as kurgjo hiq”, u shpreh një tjetër banor.
Ndërkohë, drejtori i Emergjencës në Komunën e Prishtinës, Lulzim Fushtica ka thënë që hetimet për shkakun e zjarrit kanë nisur të enjten.
“Sot kanë fillu hetimet nga inspektori i hetimit të zjarrit dhe nga policia e Kosoves dhe Forenzika dmth pasi që të përfundojë faza e hetimeve atëherë duhet të dalët e fazën e vlerësimit të dëmeve dhe fazën e raportit dhe pastaj do e shohim a kemi kërkesa nga banoret se sa është dëmi”, tha Lulzim Fushtica – drejtor i emergjencës në Prishtinë.
Fushtica ka thënë që dëmet ne objekt janë të konsiderueshme, ndërsa për shkaqet nuk ka ende një përgjigje zyrtare.
“Për momentin është shumë herët të flitet për shkakun por shihet se dëmet janë të mëdha”, tha ai.
Ndërsa, për sa i përket hetimeve për shkakun e zjarrit gjatë dites televizoni ka kontaktuar edhe Policinë por deri në këtë moment nuk kemi marrë një përgjigje.
