Zjarrfikësit në Itali po vazhdojnë përpjekjet për shuarjen e një zjarri të madh në pyje në rajonin e Toskanës, i cili ka disa ditë që është aktiv dhe është përkeqësuar nga era e fortë, duke detyruar evakuimin e rreth tre mijë personave.
Zjarri, i cili ka nisur të martën, është përhapur në një sipërfaqe prej më shumë se 800 hektarësh në Malin Faeta, duke prekur provincat Lucca dhe Pisa, ka deklaruar kryetari i komunës së San Giuliano Terme, Matteo Cecchelli, për agjencinë “Reuters”.
Sipas Cecchellit, zjarri dyshohet se është shkaktuar nga djegia e degëve të krasitura të ullinjve, e cila ka dalë jashtë kontrollit.
Gjatë natës, era e fortë ka ndihmuar përhapjen e flakëve, duke bërë që autoritetet të urdhërojnë evakuimin e banorëve, ka deklaruar kryetari i rajonit të Toskanës, Eugenio Giani.
Për shuarjen e zjarrit janë angazhuar edhe tre aeroplanë specialë që marrin ujë nga liqenet, lumenjtë dhe detet, ka njoftuar departamenti kombëtar i zjarrfikësve në rrjetin “X”.
“Zjarri është ende shumë aktiv. Po bëhen të gjitha përpjekjet për ta kufizuar perimetrin e zjarrit sa më shumë që është e mundshme, por nuk mund të relaksohemi apo të bëjmë parashikime, sepse jemi në mëshirën e erës” – ka thënë nënkryetari i qytetit Lucca, Fabio Barsanti.
