Zjarret masive që kanë përfshirë disa pjesë të Kosovës, kanë goditur sot edhe fshatin Trudë, në afërsi të Prishtinës. Pamje të siguruara nga burimet e Tëvë1 tregojnë një vatër të madhe zjarri, që ka përfshirë një pjesë të konsiderueshme të terrenit në këtë zonë.
Banorët janë ballafaquar me flakët dhe tym të dendur, ndërsa ekipet e zjarrfikësve janë angazhuar për të ndalur përhapjen e mëtejshme.
Sipas raportimeve, vatra zjarri janë regjistruar pothuajse në çdo komunë të vendit, duke e bërë këtë ditë një nga më të rrezikshmet për mjedisin dhe sigurinë publike.
Autoritetet kanë paralajmëruar rrezik të lartë dhe kanë bërë thirrje për kujdes të shtuar nga qytetarët, duke shmangur ndezjet në natyrë dhe duke raportuar çdo zjarr të mundshëm.
Zjarret po shkaktojnë dëme të konsiderueshme në hapësira pyjore, tokë bujqësore dhe infrastrukturë, ndërsa përpjekjet për t’i vënë nën kontroll vazhdojnë në shumë zona të vendit.
