Në Qendrën e Numërimit dhe Rezultateve po zhvillohet procesi i verifikimit të pakove me fletëvotime të ardhura nga diaspora.
Kjo fazë ka për qëllim të konfirmojë nëse pakoja është dërguar nga një votues i regjistruar për votim jashtë vendit.
Zëdhënësi i KQZ, Valmir Elezi thotë se deri tani janë verifikuar 9,800 pako.
“Deri të premten në 10:00, pjesa e pakove me fletëvotime që janë sjellur në Kosovë, procesit të vlerësimit i janë nënshtruar rreth 9,800 pako prej të cilave janë aprovuar 7,220, ndërkaq janë refuzuar 2,570. Arsyeja që pse janë refuzuar këto pako është se në 2500 raste mungon dëftesa e regjistrimit”, tha ai.
Elezi tregon edhe për fazën pas verifikimit dhe si do të zhvillohet numërimi i këtyre votave.
“Sa i përket fletëvotimeve nga jashtë vendit fillimisht po kryhet faza e vlerësimit që ka për qëllim të vërtetojë nëse këto pako të supozuara me fletëvotime janë dërguar nga votuesit që janë regjistruar për votim përmes postës dhe pastaj disa ditë më vonë në Qendrën e numërimit dhe të rezultateve, këto fletëvotime do të numërohen në prezencë të medieve dhe natyrisht edhe të vëzhguesve”.
Sipas të dhënave nga Komisioni Qendror i Zgjedhjeve, më 11 dhe 12 nëntor, nga kutitë postare të KQZ-së në 22 shtete të ndryshme të botës, është bërë tërheqja e 13,084 pakove të supozuara me fletëvotime, të cilat i takojnë votimit me postë jashtë Kosovës në raundin e dytë të zgjedhjeve për Kryetarë të 18 komunave.
Deri më tani, pjesa më e madhe e tyre janë sjell në Kosovë.
Kronikë e realizuar nga gazetarja, Jona Kelmendi.
