Edon Zhegrova sipas të gjitha gjasave nuk do të jetë startues te skuadra e Juventusit edhe në përballjen kundër Monacos.
Ndeshja Monaco – Juventus, luhet sonte prej orës 21:00 në kuadër të xhiros së tetë, saktësisht të fundit të fazës së ligës në Ligën e Kampionëve.
Zhegrova edhe në këtë ndeshje do të jetë rezervist, pasi trajneri i Juventusit, Luciano Spalletti ka paralajmëruar pak ndryshime në formacionin startues me të cilin e mposhti vikendin e shkuar Napolin 3:0.
Sipas Spallettit, një ndryshim do të jetë në sulm, një në mesfushë dhe eventualisht një në mbrojtje, duke përmendur lojtarët si Teun Koopmeiners, Lois Openda e Federico Gatti se do të luajnë prej fillimit.
Zhegrova në dy ndeshjet e fundit të Juventusit nuk ka luajtur fare, ndërsa në total deri më tani, ka 15 paraqitje apo 302 minuta lojë në të gjitha garat.
26-vjeçari prejse iu bashkua Juventusit në verë nga Lille, vetëm një herë ka qenë startues, ndaj Pafosit në Champions.
