Pasi mungoi në humbjen e Juventusit ndaj Comos në kampionat, Edon Zhegrova mund të mos jetë pjesë e ekipit italian edhe për duelin e Ligës së Kampionëve kundër Real Madridit.
Për shkak të lëndimit të fundit, Zhegrova mungoi në disfatën 2:0 nga Como dhe nuk dihet nëse ylli i Kosovës do të ftohet për përballjen me skuadrën spanjolle.
Juventusi, të mërkurën mbrëma luan në “Santiago Bernabeu” me Real Madridin në kuadër të xhiros së tretë të fazës së ligës të Championsit, ndërsa mbetet të shihet nëse trajneri Igor Tudor do ta përfshijë në listë Zhegrovën.
Duket se Zhegrova ende nuk është forcuar plotësisht nga lëndimi i sezonit të shkuar, shkaku i të cilit mungoi tetë muaj dhe tek Juventusi kanë personalizuar një program të veçantë për sulmuesin e krahut, në mënyrë që mos ti përsëritet dëmtimi.
Zhegrova ishte pjesë e grumbullimit të Kosovës për ndeshjet me Slloveninë e Suedinë, në të cilat pati minutazhë por me t’u kthyer në Torino ka ndjerë dhimbje për t’u lënë jashtë përballjes me Comon.
Për Zhegrovën, kjo ishte ndeshja e tretë rresht në të gjitha garat që nuk luajti për Juventusin, ekip të cilit iu bashkua në verë dhe deri më tani ka 3 paraqitje në total apo 36 minuta lojë.
